کیژی لادێ هام بە تاسەی پەلکە ڕەش سەر شانەکەت هام بە تاسەی دەم بەیانی بۆی تەنوری نانەکەت هام بە تاسەی بۆنی مێخەک، تۆی تورەنجی شاڵەکەت ڕەنگی سوخمە و سینە پۆش و بازنە و خڕخاڵەکەت سەردەمێکە دوور لە باڵات وا ڵە شارانا ئەژیم ژین چ ژینێ! چاوەکانم گیرۆدەی ئاخر شەڕیم جار بە جارە دێتە بیرم ژینی ڕابردوم لە دێ سێبەری دار و تەلان و خێزەڵانی دەوری ڕێ خوڕخوڕی فرمێسکی ‌حەسرەت جا لە چاوم دێتە خوار بۆ خوەم و بەختی سەرگەردانم ئەگریم زارێ زار دڵ تەنگم بۆ لێوی ئال و دوو دیە شەرمینەکەت بۆ دەم ئێوارانی حەوش و سۆزی مەڕ دۆشینەکەت کیژی لادێ سەختە دووریت، تاڵە رەنجی ڕۆزگار ناحەزە دووری وڵات و ناخۆشە ژینم لە شار کیژی لادێ وەختە جەرگم پڕ بە دڵ بێ بە کەواو هێندە تینوی ئاوی کێوم پڕ بە تاسەی کانیاو